محکمہ موسمیات ساوݨ دے مینھ دی شدت اچ ودھارے دی پیشگوئی کرݙتی

اسلام آباد۔ 06 جولائی (اے پی پی) لاہور سودھے پنجاب دے مختلف علاقیں اچ اڄوکے مینھ تے مشرقی دریاواں اچ پاݨی دے وہݨ اچ ودھارے توں ممکنہ خطرات دے پیش نظر نیشنل ڈیزاسٹر مینجمنٹ اتھارٹی سارے متعلقہ اداریں کوں تیار رہݨ تے موثر حکمت عملی اپناوݨ دی ہدایت کرݙتی ۔ خمیس کوں اتھاں نیشنل ایمرجنسی آپریشنز سینٹر اچ ممکنہ سیلاب نال نبݨݨ کیتے سارے متعلقہ اداریں دے نال کانفرنس دا انعقادکیتا ڳئے جیں دی صدارت چیئرمین این ڈی ایم اے، لیفٹیننٹ جنرل انعام حیدر ملک کیتی۔ کانفرنس اچ صوبائی ڈیزاسٹر مینجمنٹ اتھارٹی،پنجاب، محکمہ موسمیات پاکستان،فیڈرل فلڈ کمشن، صوبائی ادارہ نکاسی آب(ارسا)، واپڈا (منگلا ڈیم) اتے ریسکیو 1122 دے حکام سودھے اہم معاون اتے متعلقہ اداریں شرکت کیتی۔محکمہ موسمیات دے حکام بریفنگ اچ ݙسایا جو اڄوکے ساوݨ دے مینھ اچ غیر معمولی شدت دا امکان اے۔8توں 10 جولائی دریائے ستلج، راوی، چناب دے اتلے علاقیں اتے جہلم دے کجھ جہیں تے پاݨی زیادہ وہݨ دا امکان اے ۔دریائے چناب دے وہݨ تے غیر معمولی ودھارے پاروں دریائے راوی اتے چناب دے نالیں اچ وݙے درجے دے سیلاب دا خطرہ اے،محکمہ موسمیات متعلقہ اداریں کوں ہر 3 گھنٹے دے بعد اپ ڈیٹس ݙیندا پئے ۔ ریسکیو 1122 اتے صوبائی ڈیزاسٹر مینجمنٹ اتھارٹی دی طرفوں ݙسایا ڳئے جو خطرے توں ݙوچار علاقیں اچ امدادی عملے اتے مشینری دی دستیابی جیہے ضروری اقدامات مکمل کر ڳھدے ڳئن او ممکنہ ہنگامی صورتحال نال نبݨݨ کیتے ہائی الرٹ ہن۔چیئرمین این ڈی ایم اے ممکنہ سیلابی صورت حال دے جائزہ اتے خطرات نال نبݨݨ کیتے تیار رہݨ تے فعال اقدامات کرݨ دی اہمیت تے زور ݙتے ۔

مضمون کا ماخذ : میگا مولا۔

متعلقہ مضامین