سیلاب آلے علاقیں اچ بحالی کیتے ترقیاتی کماں دے پی سی ون کوں چار ݙینھ اچ چھیکڑی شکل ݙتی ونڄے ، وزیراعظم شہبازشریف

اسلام آباد۔20اکتوبر(اے پی پی) وزیراعظم محمد شہبازشریف آکھیے جو سیلاب توں متاثرہ گھر بݨاوݨ کیتے ترجیحی بنیاداں تے لائحہ عمل تیار کیتا ونڄے تے سیلاب آلے علاقیں اچ بحالی کیتے ترقیاتی کماں دے پی سی ون کوں چار ݙینھ اچ چھیکڑی شکل ݙتی ونڄے ۔ اے ہدایت انہاں آپݨی زیرِ صدارت نیشنل فلڈ ریسپانس اینڈ کوارڈینیشن سینٹر دے جائزہ اجلاس اچ ݙتن۔ اجلاس اچ وفاقی وزرا ، چیئرمین این ڈی ایم اے، چیئرمین این ایف آر سی سی اتے متعلقہ اداریں دے اعلی حکام شرکت کیتی جݙاں جو وزیرِ اعلی سندھ اتے چارے صوبیں دے چیف سیکرٹریز وڈیو لنک دے ذریعے شریک تھئن ۔ وزیراعظم آکھیے جوسیلاب جیہی قدرتی آفت تے سیاست نی کرݨی چاہیدی ۔ تباہ حال پاکستانیاں دی فلاح کیتے اساکوں سیاست کوں ھک پاسے رکھ تے متاثرین دی مدد و بحالی دے عملی اقدامات کرݨے ان ۔ سیلاب توں متاثرہ گھر بݨاوݨ کیتے ترجیحی بنیاداں تے لائحہ عمل بݨایا ونڄے۔ وزیراعظم آکھیے پاسلے دے موسم اچ سیلاب توں تباہ حال لوکاں کوں ٹھڈے موسم دے رحم و کرم تے نی چھوڑ سڳدے ۔وزیرِاعظم آکھیے وزیرِ قومی غذائی تحفظ صوبیں نال رل تے کݨک دی طلب دا تخمینہ لاون ۔ موجودہ اعداد و شمار موجب کݨک دی آندی فصل تئیں طلب دے مطابق ذخائر موجود ہن۔ اساں مصنوعی قلت پیدا کرݨ ݙیسوں نہ کہیں صوبے کوں ݨلک دا قیمتی زرمبادلہ مہانگی کݨک مل گھنݨ تے خرچ کرݨ ݙیسوں ۔ وفاقی حکومت عالمی منڈی توں سستے نرخاں تے کݨک گھن تے صوبیں کوں انہاں دیاں ضرورتاں دے مطابق فراہمی یقینی بݨیسی ۔ وزیرِ بجلی سیلاب آلے علاقیں دا خود دورہ کرتے بجلی دی فراہمی یقینی بݨاون۔ سیلاب آلے علاقیں اچ بحالی کیتے ترقیاتی کماں دے پی سی ون چار ݙینھ دے اندر حتمی شکل ݙے تے منظور کیتے ونڄن ۔ اجلاس کوں ݙسایا ڳئے جو سیلاب متاثرین دی بحالی کیتے جامع منصوبہ بندی اپݨے حتمی مرحلے اچ تے 24 اکتوبر کوں وفاقی حکومت، صوبائی حکومتاں تے بین الاقوامی اداریں دے تعاون نال تیار شدہ تفصیلی قدرتی آفت دے بعد ضرورتاں تخمینہ دی رپورٹ پیش کیتی ویسی ۔وزیرِ اعظم بین الاقوامی ڈونرز کوں پیش کرݨ کیتے سیلاب متاثرین دی بحالی دا جامع لائحہ عمل وختی مکمل کرݨ دی ہدایت جاری کیتی ۔ اجلاس اچ وزیرِ اعظم کوں بینظیر انکم سپورٹ پروگرام دی طرفوں وزیرِ اعظم فلڈ ریلیف کیش پروگرام دے تحت متاثرہ خانداناں اچ 25 ہزار فی گھراݨہ دی رقم دی تقسیم تے پیش رفت بارے ݙسایا ڳیا ۔ اجلاس اچ ݙسایا ڳئے جو ایں ویلھے پورے ملک اچ 26 لکھ گھراݨے اچ 66.22 ارب روپے دی رقم ݙتی ڳئی اے ۔

مضمون کا ماخذ : مڈاس گولڈ

متعلقہ مضامین